O Club de Lectura de Lalín celebra hoxe a súa reunión mensual

Esta tarde, ás 20 h, no edificio sociocultural da rúa Manuel Rivero, como cada último xoves de mes, desenvolverase unha nova reunión do club de lectura para persoas adultas, que reúne ao redor dunha vintena de lalinenses arredor da literatura como espazo de reflexión compartida.

Nesta ocasión, o libro a comentar é “Plata Quemada” de Ricardo Piglia, un dos escritores máis significativos da literatura arxentina das últimas décadas, cunha carreira que abrangue ensaio e narrativa e que reflexiona de modo constante sobre a ficción e a memoria. O autor parte dun atraco real dos anos sesenta para elaborar unha novela policial na que se fai tamén alegoría da violencia, da tradición e da identidade. A escrita é precisa e cabe nela o xénero da reflexión literaria: o lector entra nunha trama de acción, mais acaba cuestionándose quen é o que mira e quen é o que fuxiu.

A obra elixida para a vindeira sesión é “Calle de las tiendas oscuras” do autor francés Patrick Modiano, galardoado co Premio Nobel de Literatura. Está ambientada nun París de posguerra que se converte en escenario da perda e da busca da identidade. Con estilo contido e melancólico, Modiano conta a historia de Guy Roland, un detective amnésico que intenta reconstruír o seu pasado e descubrir quen foi. A novela non é só un suspense, senón unha indagación literaria sobre o esquecemento, a historia persoal e colectiva, e o que queda cando se apagan as luces das “tendas escuras”.

Na sesión, a coordinadora do Club de Lectura, promovido pola Concellería de Cultura do Concello de Lalín, trasladoulles a todas as persoas integrantes do Club o convite dos Clubs de Lectura de Galicia da Xunta de Galicia (Subdirección Xeral de Bibliotecas e do Libro, Servizo de Bibliotecas, Consellería de Cultura) para participar o sábado 29 de novembro na Festa dos Libros da man de Culturgal, Feira das Culturas Galegas.

A Festa dos Libros é unha iniciativa Culturgal para que os clubs de lectura sexan os protagonistas. Así dentro da programación da feira artéllase un encontro específico con autores e entre clubs, para debater propostas lidas con anterioridade e falar, tanto da experiencia lectora, como das intencións e posibilidade de futuro dentro dos clubs. Ademais entre todos elíxense recomendacións de lectura para o ano seguinte.

O programa inclúe a visita do autor Santiago Cortegoso, con quen os asistentes poderán compartir diálogo e experiencia. Recoméndase a lectura “Reconversión” que será a peza que se comentará co autor. Pola tarde haberá tempo de compartir un café e uns petiscos na compaña das lecturas máis senlleiras realizadas polos clubs de lectura xestionados desde a Rede de Bibliotecas de Galicia.