O alcalde, Blas García, e a concelleira de Promoción Económica, Ana Paz, reciben á nova directiva de XEA

O alcalde, Blas García, e maila concelleira de Promoción Económica, Ana Belén Paz, reuníronse coa nova directiva da asociación Xuntanza de Empresarios de Ames, que vén de renovar a directiva, tras un acordo unánime durante a asemblea xeral extraordinaria celebrada o pasado mes de marzo. Tratouse dunha primeira toma de contacto entre a nova directiva de XEA e mailo Goberno municipal que quere seguir mantendo a boa sintonía existente con dita entidade co obxectivo de seguir colaborando na organización de diversas iniciativas en beneficio dos establecementos comerciais e hostaleiros do concello.

O salón de plenos da Casa do Concello acolleu unha xuntanza do alcalde, Blas García, e maila concelleira de Promoción Económica, Ana Belén Paz, coa nova directiva da asociación Xuntanza de Empresarios de Ames, que vén de renovar a súa directiva. Tratouse dunha primeira toma de contacto entre a nova directiva de XEA e mailo Goberno municipal coa vontade de seguir mantendo a boa sintonía existente e colaborar activamente na organización de diversas iniciativas en beneficio dos establecementos comerciais e hostaleiros do concello.

O alcalde, Blas García destacou a labor que realiza XEA “dinamizando o comercio local de Ames, seguiremos contando con eles para promover a actividade económica do concello”. O presidente de XEA, Ramón Cordido expuxo que “a anterior directiva fixo un gran traballo e a nosa intención e continuar nesa liña. Esta nova xerencia ten a experiencia e a capacidade de traballo necesaria para facelo”.

Xuntanza do alcalde, Blas García, e a concelleira de Promoción Económica, Ana Paz, coa directiva de XEA

A renovación da directiva levouse a cabo logo de que só se presentara unha candidatura e que foi aprobada co total consenso dos socios asistentes. Os novos integrantes da directiva son: Ramón Cordido, de La Rayuela, como presidente; Antón Sanluis, de Sanluis Óptico, como secretario; e Olalla Alvite, de Nua Moda, como tesoureira. Ademais, designáronse os seguintes vocais: Jorge López, de Biosbardos (ex-presidente); Germán Mariño, de Vaca Vella, e Lucía Pego, de Papelería Chavián. Como xerente da asociación continúa Beatriz López.

Dende XEA confían no liderado e na experiencia da nova directiva para continuar promovendo o desenvolvemento económico e empresarial da localidade co fin de potenciar o comercio e hostalería local, a través iniciativas que beneficien a toda a comunidade. A idea é manter aquelas que a veciñanza acolleu con maior afán e engadir algunhas novas co fin de dar resposta ás necesidades dos socios á vez que se promove e beneficia aos veciños e veciñas de Ames.