Lousame eliminará as achegas aos grupos políticos municipais nos orzamentos de 2026

O Concello de Lousame dará un paso cara unha maior transparencia financeira ao anunciar a eliminación das achegas aos grupos políticos municipais nos orzamentos de 2026. Así o comunicou o alcalde, Esteban Ares García, durante o pleno ordinario celebrado onte xoves, no que tamén se aprobou por unanimidade a xustificación das achegas correspondentes aos anos 2023 e 2024.

“Considero que estas achegas son unha fonte de problemas e, no momento no que estamos e no contexto que nos rodea, creo que é unha forma de ser máis transparentes e evitar complicacións de cara ao futuro, tal e como vemos noutros sitios”, explicou Ares García. O alcalde puntualizou que esta medida se incluirá nos orzamentos de 2026, eliminando completamente a partida destinada aos grupos políticos municipais.

O anuncio produciuse tras a aprobación das xustificacións das achegas de 2023 e 2024, despois de que todas as facturas non xustificadas, tanto do grupo socialista como do grupo mixto, foran reintegradas. Grazas a este reintegro, que inicialmente motivara reparos por parte da Intervención Municipal, a conta xustificativa quedou a cero e a aprobación realizouse sen debate, xa que ningún grupo da oposición tomou a palabra.

A sesión plenaria mantivo esta mesma unanimidade no resto de puntos, entre os que se inclúe a aprobación dunha bonificación do 95% do IBI para inmobles nos que se desenvolvan actividades agrogandeiras do sector primario e unha modificación de crédito de 51.611 euros para o pagamento de facturas. A sesión iniciouse coa lectura do manifesto institucional contra a violencia de xénero, a cargo da concelleira de Igualdade, Silvia Agrafojo.