Chega unha nova edición do programa Cine de outono a Ames

C.A.

A Concellaría de Cultura organiza unha nova edición do programa “Cine de outono”, unha proposta que achega á veciñanza amesá diferentes propostas de cinema en galego. Nesta ocasión, o ciclo contará cunha longametraxe, que se proxectará no auditorio da Casa da Cultura de Bertamiráns, e unha curta, que se proxectará no auditorio do Milladoiro, ambas as dúas ás 20.00 horas.

“Antes de Nós”
Nesta ocasión, o ciclo contará con dúas proxeccións. A primeira delas será “Antes de Nós”, que se proxectará o vindeiro venres, 7 de novembro, ás 20.00 horas, no auditorio de Bertamiráns. Este filme estreouse o pasado 21 de maio e está dirixido por Ángeles Huerta e conta con guión de Pepe Coira. Ademais, forma parte da programación polo Ano Castelao do Concello de Ames, xa que conta parte da vida de Castelao. No filme nárrase a historia dunha parella, dous momentos.

Un baile continuo de separación e reencontro. Dúas historias entrelazadas. 1918, Castelao deixa o seu posto de funcionario en Pontevedra para traballar como médico en Rianxo durante a gripe española. Un heroe para o pobo, pero un home ausente para a súa muller, Virxinia. En 1929, a parella percorreu Bretaña uns meses despois da perda do seu único fillo. Dous seres rotos e un vínculo que xa non se entende. Unha viaxe que os unirá para sempre. Castelao antes de ser Castelao. Galicia ante a “xeración Nós”. Castelao e Virxinia antes de ser “nós”.

“Ratiña”
Por outra banda, o xoves 13 de novembro, ás 20.00 horas, no auditorio da Casa da Cultura do Milladoiro, proxectarase a curta “Ratiña”, dirixida por Alicia Úbeda. Esta proxección está subvencionada pola Deputación da Coruña e forma parte dunha actividade de mediación. Nesta sesión tamén contarase coa presenza da directora da curta para un coloquio posterior.

“Ratiña” é a primeira de varias historias autobiográficas na que, nesta ocasión, a protagonista é unha nena de nove anos que sofre bullying na escola e como afronta esa situación na súa casa. Ratiña amosa unha cara menos coñecida das consecuencias do bullying, que é a soidade que pode sentir unha nena cando, ademais de pasar medo no cole, non ten as ferramentas para pedir axuda na súa casa.