Boqueixón impulsa a seguridade viaria con dúas novas sendas peonís en Sergude e Lestedo

O Concello de Boqueixón vén de poñer en marcha as obras para a construción de dúas novas sendas peonís nas parroquias de Sergude e Lestedo. A actuación, cun investimento total que supera os 435.000 euros, busca mellorar a seguridade, accesibilidade e mobilidade dos veciños nunha zona de tránsito habitual.

No caso de Sergude, a nova senda conectará a igrexa parroquial e as aldeas de Lamas e Deseiro de Abaixo co cruce da estrada nacional N-525. O goberno municipal destaca que a intervención permitirá reducir riscos para os peóns que, ata o de agora, debían transitar por tramos de escasa visibilidade ou sen espazo habilitado para o paso seguro.

Este proxecto enmárcase nun plan máis amplo de mellora da mobilidade no municipio. De feito, está prevista tamén unha futura senda peonil entre Sergude e Rodiño, que será executada pola Xunta de Galicia. A administración autonómica agarda poder licitar esta obra en 2026, cun investimento estimado de case 750.000 euros.

Pola súa banda, na parroquia de Lestedo está xa en marcha a construción dun tramo que partirá do cruce das rúas Mestre Manuel García e Pico Sacro ata o cruceiro da localidade. Cun orzamento duns 35.000 euros, esta primeira fase permitirá habilitar un paso seguro para os peóns que se desprazan desde o centro urbano ata o pavillón polideportivo municipal.

Precisamente, este recinto deportivo está a ser obxecto doutra actuación municipal paralela. O Concello investirá 50.000 euros na mellora da súa eficiencia enerxética, co obxectivo de reducir o consumo e incrementar o confort dos usuarios.