Arzúa acolle a XXI edición do Zona da Zanfona, o festival internacional máis importante da Península arredor deste instrumento

O Concello de Arzúa presentou onte, na antiga Casa de Correos, a programación da XXI edición do Zona da Zanfona (ZdZ), un dos festivais máis singulares do panorama cultural galego e o encontro internacional de referencia arredor deste instrumento. O evento, organizado por aCentral Folque co apoio da Deputación da Coruña e do propio Concello, celebrarase do 21 ao 23 de novembro cun amplo programa de concertos, cursos, palestras, animacións de rúa e actividades de divulgación.

Esta nova edición chega acompañada do lanzamento da web oficial www.zanfona.folque.com, que recollerá información, vídeos, fotografías e arquivos das edicións anteriores, converténdose nun espazo de memoria e difusión do traballo realizado ao longo de máis de dúas décadas.

Un festival que une tradición e innovación creativa

O cartel deste ano combina artistas internacionais e galegos de primeira liña. O músico inglés Steve Tyler e a intérprete Katy Marchant abrirán o festival cun concerto de músicas medievais e composicións propias, mentres que o dúo Pärbo (Anxo Pintos e Begoña Riobó), María López, Iván Abal e o grupo Zarandela completan unha programación que amosa o dinamismo e a diversidade da zanfona na Galiza actual.

A cita contará tamén co Encontro de Escolas Galegas de Zanfona, un espazo de aprendizaxe compartida que cada ano reúne a decenas de tocadores e tocadoras de todo o país.

Unha homenaxe a tres figuras galegas, entre elas o gaiteiro de San Miguel

A XXI edición do festival dedica unha homenaxe especial a tres figuras clave da música galega: Emilio Cao, Xesús Pérez e Julio Vázquez Carril, Julio de Froilán, o gaiteiro de San Miguel, músico da parroquia arzuá de Maroxo, sobre o que o festival organiza un curso e un concerto para coñecer a súa arte coa adaptación á zanfona do seu estilo á gaita.

Julio Vázquez Carril, coñecido como Julio de Froilán, destacou polo seu estilo persoal e pola súa vinculación coa tradición musical de Arzúa e da comarca, converténdose nun referente local da música popular galega.

O Concello e a Deputación salientaron o valor cultural e educativo do festival

Durante o acto, o alcalde de Arzúa, Xoán Xesús Carril, agradeceu a presenza dos medios e das entidades colaboradoras, e subliñou a importancia da continuidade deste evento no municipio:

“Quero agradecer á Deputación da Coruña a súa colaboración neste evento e, por suposto, a aCentral Folque e a Mauro Sanín, que nos acompañan hoxe. O ano pasado o festival foi un éxito e agardamos que este ano o sexa aínda máis. O Concello ofrece toda a súa colaboración para que o Zona da Zanfona continúe celebrándose aquí nos próximos anos, porque é un evento interesantísimo e de moita calidade.”

A concelleira de Patrimonio, Lucía López, destacou o orgullo que supón para Arzúa acoller un evento destas características:

“Estamos moi honradas de poder contar cunha nova edición do Zona da Zanfona no noso concello. Ter un festival desta dimensión é un motivo de orgullo e unha oportunidade para seguir poñendo en valor o noso patrimonio e a nosa tradición musical. Queremos agradecer a aCentral Folque por escoller por segundo ano consecutivo Arzúa como sede, e tamén á Deputación polo seu apoio constante a proxectos culturais coma este.”

“O Zona da Zanfona é fundamental para manter viva a nosa tradición e para ofrecer á veciñanza actividades de calidade arredor dun instrumento tan versátil e tan noso como a zanfona, que ademais nos permite dialogar con outras culturas do mundo. O ano pasado a acollida foi magnífica e este ano queremos repetir ese éxito convidando a toda a veciñanza a participar dos cursos e dos concertos”, engadiu.

A deputada provincial Cristina García cualificou o festival como “un proxecto de referencia” e puxo en valor a súa continuidade:

“O Zona da Zanfona é un referente internacional e un símbolo da nosa tradición musical, pero tamén unha mostra da creatividade actual. É un orgullo poder colaborar con proxectos que dinamizan o territorio e que apostan pola cultura como futuro e como forma de desenvolvemento e orgullo colectivo.”

aCentral Folque presentou o programa e as novidades

O director de aCentral Folque, Mauro Sanín, agradeceu o apoio das institucións e explicou o contido do programa:

“Estamos moi contentos de estar en Arzúa por segundo ano consecutivo. Despois de máis de vinte edicións, atopamos aquí un concello comprometido coa cultura e un público moi receptivo. O festival artéllase arredor de tres eixos —concertos, cursos e o Foro ZdZ—, e este ano quixemos facer unha lembranza a tres personalidades fundamentais: Emilio Cao, Xesús Pérez e, moi especialmente, Julio de Froilán, o gaiteiro de San Miguel, tan querido nesta zona.”

“Organizamos un curso para adaptar á zanfona o repertorio e a técnica de Julio de Froilán, e un concerto no que Iván Abal presentará esas pezas. Esperamos que esta homenaxe sexa o comezo dun proxecto máis amplo que dea continuidade ao seu legado. Ademais, haberá un curso de iniciación dirixido á xente de Arzúa, ás asociacións culturais e a todas as persoas que queiran achegarse por primeira vez á zanfona. Queremos que este festival siga medrando e que continúe moitos anos máis aquí en Arzúa”, engadiu Sanín.

Música nas rúas e espazos do municipio

O programa completarase co Foro ZdZ, que incluirá a palestra “A zanfona do cego de Carelle” a cargo do luthier Xosé Manuel Tobío “Xaneco”, e coa actuación de Oli Xiráldez e Gustavo Couto no mercado quincenal do día 22, que encherá de música as rúas do centro de Arzúa.

Ademais, haberá cursos para todos os niveis, desde iniciación ata especialización, con docentes como Óscar Fernández, Iván Abal e Steve Tyler, así como unha sesión en liña impartida por Ariel Ninas, en colaboración con H.I.P.S.T.E.R. Ireland.

As inscricións poderán realizarse a través dun formulario en liña dispoñible na web do festival a partir do 3 de novembro.

Todas as actividades serán de entrada libre ata completar capacidade, agás os cursos, que requiren inscrición previa a través da web oficial do festival.

Programa destacado

Capela da Madanela e Praza de Galiza, Arzúa
21–23 de novembro de 2025
Entrada libre ata completar capacidade

Venres 21 | 21:00 h.
Capela da Madanela
Steve Tyler & Katy Marchant – María López

Sábado 22 | 11:00 h.
Mercado quincenal de Arzúa
Oli Xiráldez e Gustavo Couto

19:00 h.
Casa de Correos
Foro ZdZ: “A zanfona do cego de Carelle”, con X. M. Tobío “Xaneco”

21:00 h.
Capela da Madanela
Pärbo – Iván Abal

Domingo 23 | 12:00 h.
Praza de Galiza (ou Casa da Cultura se chove)
Zarandela – Escolas de Zanfona

Información práctica

Máis información e inscricións: www.zanfona.folque.com
Organiza: aCentral Folque | Patrocina: Deputación da Coruña | Colabora: Concello de Arzúa