Ames celebra a edición máis internacional e comprometida de Cinema Miúdo

O acto contou coa presenza do alcalde e concelleiro de Cultura, Blas García; a deputada da área de Cultura da Deputación da Coruña, Natividade González; a concelleira de Planificación e Xestión Educativa e Mocidade, Carmen Porto; o director do festival Cinema Miúdo, Juan de Castro; e maila técnica municipal do departamento de Cultura, María Vázquez. Ademais, acudiron á presentación 74 alumnos/as de cuarto curso de Educación Primaria do CEIP A Maía, que puideron ver en primicia varias curtametraxes adaptadas á súa idade. Tamén asistiron á presentación representantes de asociacións municipais.

Baixo o lema Defendamos a paz e os dereitos humanos, a edición de 2025 pon o foco na importancia da Declaración Universal da ONU e na defensa dos valores de igualdade, solidariedade e xustiza. O festival propón un programa cinematográfico amplo de curtametraxes internacionais, actuacións e obradoiros que combina calidade artística, orixinalidade e compromiso social.

Presentación da VIII edición de Cinema Miúdo
O alcalde e concelleiro de Cultura, Blas García, destacou a importancia da cultura e do cine. “Cando un ve películas, le libros, vai ao teatro ou a un evento cultural, é algo moi importante porque estamos aprendendo cousas novas sobre diferentes temas. E todo iso que aprendemos, sobre todo vós rapaces e rapazas, que sodes os máis pequenos, cando vaiades medrando, ides poder aplicalas na vosa vida. Ademais, algo fundamental da cultura é o feito de que nos axuda a pensar por nós mesmos e fomentar un pensamento crítico propio. Por iso é moi importante que vaiades ao cine e ao teatro”.

A deputada da área de Cultura da Deputación da Coruña, Natividade González, puxo en valor que “o Cinema Miúdo foi creado para os nenos e as nenas de Ames, porque vós sodes os auténticos protagonistas deste festival. E se falamos de oito anos, falamos que detrás deses oito anos nos que se leva celebrando o festival houbo moitas risas, porque o que realmente implica este festival, son moitas emocións, aprendizaxe e, sobre todo, moitísimas historias que puideron ver outros nenas e nenas como vós a través destas pantallas. Esas historias que ás veces non as vemos na realidade, pero que a través do cinema podemos chegar ata elas”.

Por outra banda, a concelleira de Planificación e Xestión Educativa e Mocidade, Carmen Porto, resaltou “é unha honra un ano máis estar aquí presentando o Cinema Miúdo, un festival que conta coa colaboración da Deputación da Coruña, o traballo de María, do departamento de Cultura, e a Juan, porque grazas a todo o persoal que organiza este festival, podemos contar cada ano coas mellores curtas, nas que se transmiten valores e aprendizaxes para todos os nenos e nenas”.

A técnica municipal do departamento de Cultura, María Vázquez, explicou que “a temática deste ano está centrada nos Dereitos Humanos, facendo fincapé na importancia da Declaración Universal da ONU na defensa de valores coma a igualdade, a xustiza e a solidariedade». Así, tamén subliñou que “este ano, como novidade, queremos achegar tamén os contidos do festival a un público máis amplo e diverso e, por iso, unha das sesións da selección oficial contará cun subtitulado específico para persoas con discapacidade auditiva”.

Por último, o director do festival Cinema Miúdo, Juan de Castro, destacou que “esta edición teremos máis de 60 curtametraxes, contando con películas que moitas delas non se proxectaron aínda nin en Galicia nin España. Temos tamén a sorte de ter, outra vez, a colaboración de festivais estranxeiros, algo que di moito tamén deste festival, pois hai proxectos de fóra que miran cara o Cinema Miúdo”. Engadiu que, “teremos películas sobre a temática central deste ano, os dereitos humanos, pero tamén filmes para escachar da risa, divertirse, e por suposto, teremos O peliculón, que este ano vai ser moi exclusivo pois acaba de estrearse en España”.

Curtametraxes internacionais
A sección oficial deste ano inclúe nove bloques de curtametraxes a concurso: seis dirixidos a público maior de 7 anos (Buxainas) e tres pensados para menores de 7 anos (Axóuxeres), ademais de tres sesións específicas para escolares. En total, participarán filmes procedentes de 21 países diferentes, entre eles Corea do Sur, Croacia, Dinamarca ou os Países Baixos, o que reflicte o carácter internacional e plural do certame.

En coherencia coa temática dos dereitos humanos, e como novidade,  o festival inclúe dúas sesións especiais baixo o título Cinema en Valores: unha dedicada a clásicos en branco e negro, que reivindica a memoria e a historia do cinema como vehículo de reflexión social, e outra formada por pequenas xoias contemporáneas que abordan cuestións actuais dende unha mirada sensible e educativa.

Cinema Miúdo 2025 outorgará seis galardóns, recoñecendo tanto o voto do público como o criterio do xurado profesional: Axóuxeres Xurado, Axóuxeres Público, Buxainas Xurado, Buxainas Público, Escolares e o Premio Hematocrítico, destinado á curta que mellor relacione o cinema coa literatura.

Obradoiros e actividades paralelas
Debido ao gran éxito das edicións anteriores, nesta ocasión celebraranse dous obradoiros nos que a rapazada poderá crear efectos especiais e as súas propias animacións. O primeiro, Efectos especiais con Ricardo Spencer, achegará aos nenos e nenas os segredos da maxia cinematográfica, creando feridas e maquillaxes con materiais caseiros, ideais tamén para o Samaín.

O segundo, un obradoiro de Stop Motion con Fernando Cortizo. Esta arte cinematográfica consiste en crear a sensación de movemento a través da sucesión de fotografías. Para isto, os participantes moldearán os seus propios personaxes e crearán unha escena fotograma a fotograma, dando vida a unha pequena película de animación coas súas propias mans. Cortizo é, autor de numerosas curtametraxes, ademais do filme O Apóstolo (2012), a primeira longametraxe europea en stop motion estereoscópico, unha obra de referencia no cinema de animación.

As prazas para os obradoiros son limitadas e é preciso formalizar a inscrición a través do correo electrónico actividades@cinemamiudo.gal, indicando nome, ideade e teléfono de contacto. Estas actividades están dirixida a nenos e nenas de 8 anos en diante e terán unha duración de 2 horas.

Inauguración e clausura cheas de emoción
A gala de inauguración, o venres 14 ás 17:00 horas,  contará coa participación da escola de danza Danzaya Ames, que ofrecerá unha posta en escena chea de enerxía para dar inicio ao festival. A gala de clausura correrá a cargo do coñecido Peter Punk, que presentará un espectáculo cómico e reivindicativo centrado na defensa dos dereitos humanos e na mensaxe de paz que inspira toda esta edición.

Con esta proposta, Cinema Miúdo consolídase como un referente cultural en Galicia e un espazo de encontro para o público infantil e familiar. O certame propicia que a rapazada descubra o gusto polo cinema e que se forme un público futuro con sensibilidade artística, interese cultural e espírito crítico ante o consumo audiovisual. Isto ten especial relevancia para o Concello de Ames, que ten a maior ratio de nenos e nenas de toda Galicia.

Ano a ano o Festival Internacional de Cinema Infantil de Ames reivindica que as pantallas tamén poden educar, emocionar e transformar o mundo dende a mirada dos máis pequenos.

Venda de entradas
A entrada ás proxeccións realizarase mediante abono único que está dispoñible na Billeteira electrónica do Concello de Ames. O abono canxearase na primeira sesión por unha pulseira identificativa, que permitirá o acceso a todas as proxeccións. Xunto coa pulseira, o público recibirá un programa en formato álbum de cromos, que poderá ir completando nas distintas sesións e obradoiros.