A lingua e a tradición popular collen impulso na Biblioteca… “En galego, ata o infinito e máis alá!”

Despois do éxito da pasada semana co espectáculo “Contos nas orellas”, a campaña “En galego… ata o infinito e máis alá!”, impulsada pola Concellaría de Normalización Lingüística do Concello de Arzúa, continúa este venres 6 de xuño cunha nova actividade dirixida ao público familiar.

Ás 18:00 horas, a Biblioteca Municipal Rosalía de Castro acollerá o contacontos ilustrado “Cantareiras, poesía popular nas letras galegas 2025”, da man de Polo Correo do Vento. A proposta combina narración oral e ilustración en directo co obxectivo de achegar á infancia o valor da poesía oral e das pandeireteiras como transmisoras da lingua e da cultura galegas.

A concelleira de Normalización Lingüística, Lucía López, destacou que “con este programa estamos a facer da biblioteca un espazo de lecer no que as familias e as crianzas se achegan ao galego dun xeito natural e divertido”. E engadiu que “a perda de falantes da nosa lingua propia entre a xente nova confirma que é fundamental que o galego estea presente en todos os ámbitos da vida, especialmente nas primeiras etapas”.

A campaña “En galego… ata o infinito e máis alá!”, que conta coa colaboración da Deputación da Coruña, está a consolidarse como un punto de encontro semanal arredor da lingua, onde o galego se vive con normalidade e se lle amosa ás máis pequenas e pequenos todo o seu potencial creativo desde os primeiros anos de vida.

Desde o Concello de Arzúa anímase á veciñanza a participar nesta nova cita que mestura tradición oral, ilustración e música, reivindicando a forza da cultura popular como camiño para fortalecer o uso do galego entre as novas xeracións.