A Baña prepárase para vivir este domingo, 16 de febreiro, unha nova edición da súa emblemática Festa da Filloa da Pedra, un evento que combina gastronomía, tradición e cultura nunha xornada pensada para toda a familia.
Desde primeira hora da mañá, o pavillón de San Vicenzo converterase no epicentro da festa, onde os asistentes poderán degustar as tradicionais filloas da pedra, ademais de orella, chourizos e polbo. Para garantir unha produción constante ao longo do día, haberá 30 pedras en funcionamento, asegurando que ninguén quede sen probar este manxar típico.
Un programa cheo de actividades
A xornada arrancará ás 9:30 horas coa apertura do recinto e a instalación do mercadiño de artesanía e a mostra de artesanía en vivo. Ás 10:00 horas, os amantes do deporte terán a oportunidade de participar na Ruta Ciclista da Filloa, unha actividade non competitiva que combina deporte e natureza.
Ás 12:00 horas, a música tradicional tomará protagonismo da man da Escola de Música Tradicional da Baña, e, á mesma hora, a Asociación de Familias de Alumnos e Alumnas do CPI San Vicente organizará un obradoiro de estampado de camisetas para nenos e nenas a partir de 7 anos.
O pregoeiro desta edición será Alonso Caxade, mestre e músico, que intervirá ás 13:00 horas para dar o seu discurso. A continuación, ás 13:30 horas, dará comezo a sesión vermú con Trío Alborada, 7 Ferrados e Os Carunchos, grupos de referencia da música tradicional galega.
Xa pola tarde, ás 17:00 horas, o historiador Xavier Castro Pérez presentará o seu libro Ben mantidos. Historia cultural da Gastronomía Galega, unha obra que analiza a evolución da alimentación en Galicia.
O broche de ouro poñerao, ás 19:30 horas, a actuación de Fillas de Cassandra, un dos grupos máis destacados da escena musical galega actual.
Un paso máis cara ao recoñecemento como Festa de Interese Turístico de Galicia
A Festa da Filloa da Pedra continúa medrando ano tras ano, e na pasada edición conseguiu reunir arredor de 10.000 asistentes e servir máis de 6.000 filloas. Ante esta traxectoria, o Concello da Baña aprobou por unanimidade solicitar a súa declaración como Festa de Interese Turístico de Galicia. Para reforzar esta iniciativa, durante a festa recolleranse sinaturas entre os asistentes.
Con esta celebración, A Baña revalida a súa aposta pola gastronomía e a tradición, consolidándose como un destino de referencia para os amantes da boa comida e da cultura popular.
