A Asociación de Empresarios do Parque Empresarial Novo Milladoiro presenta o XI Certame de Fotografía Comercial

O local da Asociación de Empresarios Novo Milladoiro acolleu hoxe pola mañá a presentación da décimo primeira edición do certame de fotografía. A presentación correu a cargo do presidente da Asociación de Empresarios Novo Milladoiro, Javier Santos; do alcalde de Ames, Blas García; e da concelleira de Promoción Económica, Ana Belén Paz. Tamén acudiu Alberto Uzal, de Fílmate Estudos Fotográficos e Audiovisuais, que forma parte do xurado.

O presidente da Asociación de Empresarios Novo Milladoiro, Javier Santos, destacou a importancia e o éxito do concurso recordando que “dándolle continuidade estamos a crear un arquivo gráfico que nos permitirá botar a vista atrás e ver como este parque foi cambiando e adaptándose aos tempos. Xa son máis de 10 anos e esperemos que sexan 10 máis de certame con esta participación”.

O alcalde Blas García, celebrou a nova edición dun certame que segue sumando anos de vida e segue mostrándolle ao mundo o talento existente no parque empresarial: “Este é un instrumento de promoción moi potente que vale a pena coidar”.

Baixo o lema “Visión da empresa actual”, o certame convida a afeccionados e profesionais da fotografía a retratar a vida empresarial, as instalacións, os produtos e o equipo humano das empresas situadas no polígono, reflectindo unha visión dinámica, positiva e creativa do tecido industrial e comercial do Milladoiro.

Prazo de presentación de fotografías aberto ata o 30 de novembro

A participación está aberta a todas as persoas residentes en España, sen límite de idade, e a inscrición é totalmente gratuíta. Cada participante poderá presentar unha soa fotografía, en cor ou en branco e negro, realizada con calquera técnica fotográfica, sempre que se aprecie claramente a conexión co Parque Empresarial do Milladoiro. As imaxes deberán enviarse por correo electrónico a foto@aenovomilladoiro.com, indicando no asunto “Certame fotográfico: título da fotografía”. O prazo de presentación permanecerá aberto do 27 de outubro ao 30 de novembro de 2025 ás 23:59 horas.

O xurado, formado por profesionais da fotografía, representantes do Concello e membros da Asociación, concederá tres premios de 500, 400 e 300 euros, respectivamente, aos que se lles aplicarán as retencións fiscais correspondentes. As obras finalistas e premiadas serán expostas na Casa da Cultura do Milladoiro entre o 18 de decembro de 2025 e o 31 de xaneiro de 2026, e posteriormente na sede da AEPEM e nas redes sociais da Asociación.

A gala de entrega de premios celebrarase o xoves 18 de decembro de 2025 ás 20:30 horas na Casa da Cultura do Milladoiro. Durante o acto proxectaranse todas as fotografías presentadas e daranse a coñecer as persoas gañadoras.

Para máis información, as persoas interesadas poden consultar a web www.aenovomilladoiro.com ou contactar coa Asociación de Empresarios do Parque Empresarial do Milladoiro no correo info@aenovomilladoiro.com.