A Xunta avanza coas rexións do suroeste europeo na accesibilidade e inclusión no Camiño de Santiago

Representantes das entidades socias do proxecto europeo ULTREIA SUDOE, cofinanciado polo programa Interreg Sudoe, nos que se atopa a Xunta de Galicia a través do Xacobeo, reuníronse en Toulouse (Francia) para celebrar dúas xornadas de traballo técnico e actividades de intercambio no marco da cooperación transnacional sobre os Camiños de Santiago, centradas fundamentalmente na accesibilidade e inclusión.

A reunión congregou a institucións de España, Francia e Portugal implicadas na valorización cultural, turística e socioeconómica dos itinerarios xacobeos e desde o Xacobeo afondouse na experiencia da Xunta de Galicia na xestión do Camiño de Santiago, a través de distintas iniciativas como as medidas de accesibilidade nos albergues públicos da Rede Pública do Xacobeo no marco do Plan Director dos Camiños de Santiago 2027.

A xornada incluíu unha visita técnica ao Camiño de Santiago, entre as localidades de Sainte-Juliette e Lauzerte onde os socios do proxecto percorreron a pé este tramo emblemático co propósito de analizar in situ os recursos patrimoniais, naturais e turísticos vinculados ao itinerario xacobeo.

Avaliáronse directamente aspectos clave para a implementación de accións piloto no marco do proxecto ULTREIA SUDOE, reforzando o enfoque territorial e a cooperación transnacional ao redor dos Camiños de Santiago. Proximamente un grupo de persoas con discapacidade, xunto con profesionais de Amica, Fundación Camino Lebaniego e COCEMFE Cantabria, continuará traballando na cuarta análise de accesibilidade e inclusividade do proxecto, centrada esta vez no contorno de Eauze. O encontro concluíu coa planificación dos próximos fitos, entre eles a celebración do Seminario Internacional 2026, accións formativas sobre inclusividade, e a próxima reunión de socios, que terá lugar en Galicia.

Vista posta no Xacobeo 2027

O proxecto ULTREIA SUDOE iniciouse en 2024 e está previsto que se expanda ata fins de do 2026, coa vista posta no Xacobeo 2027. As dúas liñas principais de acción desenvoltas ata a data encamiñáronse á identificación de recursos materiais e inmateriais dos Camiños, así como á achega ao público dos recursos e valores das distintas rutas. O obxectivo final é promover as actividades de interior, á vez que se traballa a favor dos territorios rurais polos que discorren os itinerarios. A iniciativa conta cun orzamento de 1,4 millóns de euros, financiados nun 75% polo programa Interreg SUDOE.